Que s’acabè lo 18 de deceme passat lo somiu mondiau de København sus l’arrecauhament climatic. Com ac podèvam prevéder, las negociacions enter govèrns n’an pas permetut que d’arribar a un sonque acòrd simbolic, non pas chifrat, qui n’aurà pas nat efèit tà la reduccion de pollucion en CO2 deu planeta. De mei, aqueth somiu qu’amuishè que’s hèn enlà l’un de l’aute los Estats dits occidentaus e los Estats mei praubes.

Entà Libertat, aquera mauescaduda n’ei pas tanpòc ua desillusion. Non podèva pas sortir arren de concrèt e d’utile d’aqueth encontre qui costè milions, e qu’ei ua engana d’esperar un miracle de la part deus caps d’Estats occidentaus qui produseishen la màger part de las emissions e son oposats a l’idea de decreishença.

L’argument avançat peu govern francés qui hè deu nuclear ua alternativa credibla qu’ei ua engana e que tornam díser a d’aqueth parat la nosta oposicion pregonda a d’aqueth tipe d’energia.

Qu’existeish au dia de uei un cambiament climatic devut en partida a l’activitat umana qui hica en causa l’aviéner deu planeta, mes voler sauvà’u shens cambiar radicaument lo sistèma de societat qu’ei ua eretgia.      (Suite et version française)

Dim lights Embed Embed this video on your site

Dimars lo 1^er de deceme la seccion Bearn de LIBERTAT que portè lo son sostien au camarade Georges Ibrahim Abdallah, comunista libanés empresoat despuish 25 ans quitament s’ei liberader despuish 10 ans. Georges que compareishó per davant la justici per aver arrefusat un prelhevament d’ADN.

A l’aperet deu son comitat de sostien, un quarantenat de personas que s’amassèn per davant lo palai de justícia de Tarba. La sedença qu’èra publica e qu’avem donc assistit a un procés jà hèit per avança. La jutja qu’i tiengó lo ròtle de defenidora de la borgesia e que tractè Georges d’ua faiçon hastiau en condamnà’u a 3 mes de preson.

Dim lights Embed Embed this video on your site

Dissabte lo 28 de noveme en Gasconha Nòrd, mei de 2000 personas que manifestèn contra lo projuècte de LGV qui preved d'arreligar Bascoat a Paris en passar per Occitania. Libertat qu'èra present e que serà present a cada mobilizacion contra aqueth projècte inutile e desastrós entau país noste.

Delà de las maishantas consequéncias environamentaus que coneishem tots, qu'ei tot un projècte de societat que condemnam.  Qui ne'n vòu d'aquera LGV e perqué ? La societat capitalista que sostien un productivisme creishent qui non hè pas qu'ahortir la centralizacion de l'Estat francés a l'entorn de París e qui non corespon briga aus besonhs de las populacions. En plaça de sostiéner projèctes per toristas e elitas qui còstan miliards, las diferentas collectivitats que deverén meilèu finançar com cau lo hialat TER qui ei uei dens un estat pietadós.